На многу од нас, чизкејк ни е омилен десерт или барем во топ 3, нели?

Ако и вие сте љубител на овој лесен и вкусен десерт, топло ви го препорачувам да си го запишете најубавиот рецепт за чизкејк што ќе го споделам со вас.

Зошто Чизкејк е Одличен Десерт Што Секој Треба да го Знае?

Јас имам неколку причини зошто го подготвувам често. Првата е тоа што е превкусен, втората е тоа што опциите за вкусови се многубројни (чоколадо, овошје, нутела, манго, итн.) и третата е лесната подготовка.

Дури и да не поминувате многу време во кујна, ќе можете да си го подготвите со леснотија. Чизкејкот е совршен десерт заради својата неутралност која ќе им се допадне на луѓе со различни вкусови.

И, воопшто не е тежок за јадење што го прави совршен за летниот период. Лесен и сочен, чизкејкот брзо станува десертот што сите ќе го бараат!

Ако сакате и вие да ги изненадите вашите најмили, пробајте го мојот рецепт! Ако уште не ве убедив, само погледнете како изгледа:

Најубавиот Рецепт за Чизкејк

За подлогата:

300 гр. мелени бисквити

100 гр. маргарин

150 гр. сок од портокал (газиран)

Подготовка:

Спојте ги состојките да добиете хомогена смеса. Ставете ја во тавче со обрач и притиснете убаво да се распореди еднакво.

За белиот крем:

400 гр Маскарпоне сирење

150 гр. шеќер во прав

250 гр. изматена слатка павлака

150 гр. кисела павлака

1 кесичка желатин

50 мл. вода

Подготовка:

Изматете го маскарпонето и шеќерот во прав околу 2, 3 минути со миксер. Додајте ја изматената слатка павлака и киселата павлака.

Додајте го и желатинот претходно отстоен во 50 мл вода (загреан на тивко на рингла или во микро).

Го нанесувате овој слој преку подлогата и го измазнувате. Ставете во фрижидер да се лади 2 часа.

За овошниот крем:

300 гр овошје по избор

300 мл вода

1 кесичка желатин (претходно отстоен во 100 мл вода)

Подготовка:

Изблендирајте го овошјето со 300 мл вода. Ставете го на тивко да врие околу 5 до 6 минути. Тргнете на страна и додајте го желатинот.

Извадете го чизкејкот од фрижидер и покријте го со овошниот фил.

Вратете го пак во фрижидер, најдобро да отстои 24 часа или преку ноќ. Наредниот ден си го вадите обрачот и сечете по желба!

На здравје!

Си одите веќе?-Нема проблем! Можеме да се дружиме и да споделуваме рецепти и на социјалните мрежи! Следете ме на инстаграм за уште многу прекрасни рецепти gotvimesojadranka и придружете се на мојата ФБ група Gotvime so Jadranka која веќе брои 8000+ членови кои споделуваат извонредни рецепти!